Úrslit með ólíkindum

Minn óskalisti var: Lettland, Holland, Ungverjaland (blúsinn), Albanía, Noregur, Georgía, Makedonia, Króatia, Ísland og Kýpur. 

Fast þar á eftir setti ég Serbíu, Danmörku, Portúgal, Eistland, Tékkland og Austurríki. 

Þar neðan við setti ég Hvíta-Rússland, Pólland, Tyrkland og Slóveniu - öll slöpp.

Allra lélegust fannst mér Búlgaría (horror), Belgía, Ísrael, Montenegro, Sviss, Moldavía, og Malta.  

þau breiðletruðu komust áfram og eru úr öllum flokkum hjá mér.  Merkilegt að Albanía og Króatía skyldu ekki komast áfram en kannski eru Albanar ekki með í samkrullinu þar sem þeir eru að miklu leyti múslímar.  Nei maður botnar ekkert í þessu og því miður finnur maður sömu skítalykt og Eiríkur Hauksson.  Búlgaría í úrslit!?

Ég held að Vestur-Evrópa verði bara að taka upp sína eigin keppni því þetta er bara skrípaleikur.  

Eiríkur: Samsæri austantjaldsmafíu

Framsókn stækkar á kostnað Sjálfstæðisflokks

Fyrirsögn Mbl.is er sérstök ("Samfylking og Vg bæta við sig").  Af henni mætti ráða að xS og xV væru í sókn en í raun eru þau saman með 2 þingmönnum minna en fyrir 2 dögum síðan.  Það er auðvitað hægt að miða við gærdaginn en það var í fyrradag sem einhver marktæk breyting varð á fylgi flokkanna.  Fyrirsögnin ætti því að vera "Framsókn heldur enn í fylgisaukningu sína".    Það er ljóst að Framsókn hefur fengið mest af þessu nýja fylgi frá Sjálfstæðismönnum en etv. voru fylgismenn þeirra í "felum" þar og eru nú að sækja í viðjur vanans (eða hlýða fjölskyldunni) heim til xB. 

Frjálslyndir hafa fengið 4. manninn og því hefur Kaffibandalagið aðeins misst 1 mann frá því fyrir 2 dögum og hefur samtals 31 þingmann.   Stjórnin hangir á bláþræði með 32 þingmenn. 

Íslandshreyfingin er föst í 2-3% og atkvæði þeirra eru því miður dauð, þ.e. gagnast engum.  Að vísu virtist slatti af atkvæðum þangað koma frá Sjálfstæðismönnum (um 4% af fyrri kjósendum þeirra, þ.e. 4% af 36%) samkvæmt könnunni fyrir 2 dögum síðan og birt var í prenti á síðum Morgunblaðsins.   Talsvert færri komu frá Vinstri grænum (3.6% af 9%) og fylgi frá xB og xS var vart mælanlegt.  Þessar tölur gáfu ekki til kynna hversu mikið af nýjum kjósendum væru að kjósa Íslandshreyfinguna en mér sýnist að óhætt sé að álykta að framboð flokksins sé ekki að valda töpuðum jöfnunarsætum frá stjórnarandstöðunni og er það mér léttir.

Kjósa þarf stjórnarandstöðuflokkana og koma ríkistjórninni frá af eftirfarandi ástæðum:

• Stöðva þarf ofþenslu í efnahagslífinu og koma stýrivöxtum niður en þeir stýra m.a. því hversu miklir vextir eru á yfirdráttarheimildum.
• Stöðva þarf frekari stóriðju, sérstaklega á suðvestur horninu.  Eina álverið sem ég sæi mögulegt til viðbótar er álver við Húsavík en náttúra landsins er betur sett án þess.  Getur ein ríkasta þjóð heims virkilega ekki fundið annað að gera en að reisa mengandi stóriðju?
• Með því að hætta við frekari stóriðju kólnar hagkerfið og því skapast skilyrði til að afnema þá ósanngjörnu skattheimtu á íbúðarkaupendur sem kallast stimpilgjald (1.5% af lánsupphæð til íbúðarkaupa).  Ríkisstjórnin braut loforð sitt um að afnema þennan óréttláta skatt á kjörtímabilinu.  Því ættum við að treysta þeim nú til að gera það?
• Gera þarf innflytjendalöggjöf manneskjulegri.  Burt með 24-ára makaregluna sem ríkisstjórnin kom á.  Dómstólar hafa dæmt hana á skjön við stjórnarskránna.  Leyfa þarf innflytjendum að kjósa fyrr, t.d. eftir 2 ára fasta búsetu hér. 
• Leiðréttum kjör aldraða og öryrkja með því að taka af þessar fáránlegu skerðingar og setjum fé í að auka heimaþjónustu og byggja fleiri hjúkrunarrými (fyrir þá mest heilsuskertu).   Það eru enn tugir eldra fólks á bráðdeildum Landspítalans og ríkisstjórnin hefur ekki náð að ráða við þennan vanda s.l. 16 ár.   Við erum verr sett í þessu en fátækasta borgarhverfi New York borgar, Suður-Bronx en þar vann ég á spítala í 7 ár.  Fólk er aldrei lagt þar inn á ganga eins og tíðkast hér enn.
• Hækka þarf persónuafsláttinn og frítekjumarkið.  Sú breyting gagnast þeim lægst launuðu best.  Ég er ekki fylgjandi hátekjuskatti því að hann skekkir launasamanburð og kemur niður á fólki sem leggur á sig mikla vinnu. 
• Aðskilja þarf ríki og kirkju, bæði í stjórnarskrá og almennum lögum.  Kirkjan kostar ríkið tæpa 4 milljarða í rekstri á ári hverju.  Prestar fá of há laun (prestur í sæmilega stóru prestakalli fær betri grunnlaun en sérfræðingur á sjúkrahúsi) og vinna þeirra og kaup ætti að vera háð markaðslögmálun en ekki föstum launum frá ríkinu.  Allar nútímalegar stjórnarskrár í ríkjum Evrópu kveða á um aðskilnað ríkis og trúar.  Við lifum við veraldlegt stjórnarfar að grunni til og við eigum að hafa það algerlega á hreinu að svo sé á öllum sviðum.  Núverandi fyrirkomulag hangir í trúarhefð sem á ekki rétt á sér og sást það m.a. á áhrifum kirkjunnar á lagasetningu varðandi leyfi trúfélaga til að gefa saman samkynhneigða.  Ferð alþingismanna í kirkju fyrir setningu alþingis er brot á jafnrétti og þeirri kröfu að þjóðin sé að kjósa sér veraldlega fulltrúa á þing, ekki trúarlega.  Alþingi er ekki trúarstofnun og á ekki að eiga nein viðskipti við þjóðkirkjuna eða aðrar slíkar.   Þó að aðeins Frjálslyndi flokkurinn sé sá eini sem hafi það skýrt í stefnu sinni að aðskilja ríki og kirkju, þá eru það stjórnarflokkarnir sem halda fastast í núverandi fyrirkomulag. 
• Aðskilja þarf kirkju og skóla.  Þjóðkirkjan er með trúarlega starfsemi í nokkrum skólum undir heitinu "Vinaleið".   Menntamálaráðherra hefur bent á skólana og skólarnir bent á ráðherrann.  Margir hafa ályktað gegn þessari starfsemi, m.a. samtökin Heimili og skóli, Siðmennt, SUS í Garðabæ, Ungir Vg og fleiri.  Afnema þarf klausuna "kristilegt siðferði" í grunnskólalögunum því það er "almennt siðferði" sem gildir í skólum landsins. 
• Gefa þarf lífsskoðunarfélögum (félög sem fjalla um siðferði, lífssýn, heimssýn og félagslegar athafnir fjölskyldunnar) sömu réttarstöðu og trúfélögum, þ.e. að þau fái skráningu og "sóknargjöld" rétt eins og þau.  Til þess að svo verði þarf lagabreytingu en Allsherjarnefnd Alþingis og Björn Bjarnason dóm- og kirkjumálaráðherra hafa ekki haft áhuga á því að verða við þessari sjálfsögðu breytingu.   Því á Siðmennt að líða fyrir það að trúa ekki á æðri mátt?  Um 19.1% (+/- 2.6%) eru trúlausir á Íslandi.  Þetta er stór hópur og ætti að hafa rétt á því að það lífsskoðunarfélag sem er fánaberi skoðunnar þeirra njóti jafnréttis í landinu.
• Jafnrétti í launaþróun kynjanna.  Við erum með versta launamun kynjanna í nær allri Evrópu!!  Hvar er beiting núverandi stjórnvalda fyrir leiðréttingu á þessu?
• Vinnuþjörkun.  Við vinnum þjóða mest í vestur-Evrópu.  Er ekki tími til kominn að hlúa betur að fjölskyldum þjóðfélagsins og gera okkur kleift að lifa lífinu utan vinnutímans?  Við búum í okursamfélagi þar sem höft á samkeppni (t.d. stimpilgjöldin) og jaðarskattar eru að klyfa heimilin.  Ég hef ekki séð þetta mál á dagskrá hjá stjórnarflokkunum.
• Menntun.  Stjórnarflokkarnir eru líklegri en hinir að halda áfram með gjaldtöku í skólakerfinu og auka skráningargjöld.  Menntun er grundvallarforsenda áframhaldandi framþróunar og vaxtarsprota og fjölbreytni í atvinnulífinu.  Menntun á að vera öllum aðgengileg, líka fólki úr fjölskyldum sem hafa tekjur undir svokölluðum fátæktarmörkum.
• Sjávarútvegsmál.  Sanngjarnari atvinnustefna og betri fiskveiðistefna verður ekki tekin upp hjá núverandi stjórnvöldum.  Þarna er verulega brýnt að snúa þróuninni við og kjósa stjórnarandstöðuna.  Allir í bátana, krefjumst atvinnuréttar okkar!

Íslenskt stjórnarfar þarf breytingu og aukna áherslu á mannréttindi og bætt kjör þeirra verst settu.  Náttúra Íslands þarf aðhlynningu og stóriðjustefnan þarf að víkja.  Efnahagskerfið þarf kælingu og stýrivextir og verðbólga að lækka - þannig minnkar sjálfkrafa streymi erlends verkafólks inn í landið.  Það er kominn tími á áherslubreytingar og framfarir á sviðum sem stjórnarflokkarnir eru blindir á.  Því miður eru atkvæði greidd Íslandshreyfingunni "dauð" nema að þau komi frá fyrrum kjósendum stjórnarflokkanna. 

Kjósum til breyttra og betri tíma, kjósum nýja stjórn!

 

Samfylking og VG bæta við sig

Vísindi eða gervivísindi - þekkjum þau í sundur

Vísindi	Gervivísindi (kukl)
Niðurstöður þeirra eru f.o.f. birtar í vísindatímaritum sem taka aðeins við efninu eftir rýni nefndar óháðra vísindamanna og viðhalda ströngum stöðlum um heiðarleika og nákvæmni.	Niðurstöður þeirra eru birtar í ritum sem beint er að almenningi. Það er engin rýni annarra, engir staðlar, engin leit að staðfestingu frá öðrum rannsóknum, og engar kröfur um nákvæmni.
Krafist er að hægt sé að endurtaka rannsóknina með sömu niðurstöðu; skýra þarf mjög nákvæmlega frá rannsóknaraðferðum svo þær megi framkvæma annars staðar og þær endurbættar.	Niðurstöðurnar er ekki hægt að endurtaka eða sannreyna af öðrum. Rannsóknaraðferðunum, ef til staðar, er iðulega svo óljóst lýst að er ekki hægt að skilja hvernig þær fóru fram eða út á hvað þær gengu.
Horft er eftir villum eða neikvæðum niðurstöðum og þær rannsakaðar áfram því rangar tilgátur geta oft leitt til annarra réttra ályktana með endurskoðun hlutanna.	Horft er framhjá neikvæðum niðurstöðum eða þær afsakaðar, faldar, logið um þær, minnkaðar, gefnar gerviskýringar, látnar líta út eðlilegar eða látnar gleymast hvað sem það kostar.
Með tímanum er meira og meira lært um þau efnislegu ferli sem rannsökuð eru.  Búin eru til tæki (t.d. rafeindasmásjá) byggð á því sem lærst hefur.	Engin efnisleg fyrirbæri eða ferli finnast eða eru rannsökuð.  Engar framfarir verða; ekkert haldbært er lært.  Engin tæki eru smíðuð út frá þeim
Sannfæra með vísun í rannsóknargögn, með rökræðu sem byggist á rökrænni og/eða stærðfræðilegri málfærslu, að því marki sem gæði gagnanna leyfa. Þegar nýjar niðurstöður eru betur studdar en þær gömlu, eru þær nýju teknar upp og þær gömlu aflagðar.	Sannfæra með vísun í trú og traust. Gervivísindi hafa sterkan trúarlegan blæ: þau reyna að snúa, en ekki sannfæra. Maður á að trúa þeim þrátt fyrir staðreyndir málanna, ekki vegna þeirra.  Upphaflega hugmyndin er aldrei aflögð, sama hvað staðreyndirnar segja.
Vísindamaður vinnur ekki við, mælir með, né markaðssetur ósannaða vöru eða þjónustu.  Hann segir frá bæði kostum og göllum meðferðarúrræða.	Gervivísindamaður (kuklari) vinnur fyrir sér að hluta eða að fullu með því að selja vafasamar heilsuvörur  (t.d. bækur, námskeið, og fæðubótarefni) og/eða þjónustu (t.d. ofnæmisgreiningu, persónulestra og skilaboð að handan).  Hann segir ekki frá göllum/ takmörkunum vörunnar eða þjónustunnar.

Mikil spenna

Þessi könnun er stærri (1150 manns í úrtaki) og því marktækari en þessar venjubundnu 800 manna kannanir.  Svarhlutfallið er að vísu áfram lágt eða um 63% en það er þannig líka í fyrri könnunum.  Það er því ekki víst að hið "óákveðna fylgi" sé neitt komið á hreyfingu.

Ljóst er að ríkisstjórnin hangir á bláþræði og þrátt fyrir aukið fylgi til xB nú er xD að dala.  Frjálslyndir eru líkt og kötturinn með 9 líf og hangir inni.  Athyglisvert er að nú eru xS og xV komnir saman með 29 þingmenn og með xF uppí 32.  Kaffibandalagið er því heldur að hitna á ný og með 2-3 sætum í viðbótum gætu það myndað starfshæfan meirihluta. 

Þrátt fyrir margt gott er Íslandshreyfingin ekki að hrífa kjósendur eða hreinlega tíminn var of naumur til að skapa nauðsynlegt traust.  Eitt af megin markmiðum stofnunar hennar var að skapa valkost rétt hægra megin við miðju sem gæti höfðað til talsverðs hluta fólks úr stjórnarflokkunum og þannig stuðlað að því að ríkisstjórnin falli.  Þetta markmið hefur ekki náðst og nú er hætt við að atkvæðin til Íslandshreyfingarinnar falli niður dauð og hjálpi áframhaldandi stóriðjustefnu.  Best væri að hún drægi framboð sitt til baka til að Kaffibandalagsflokkarnir eigi meiri séns, en það hefur frekar virst að kjósendur flokksins samsamist frekar vinstri flokkunum en þeim hægri.  Miðað við að það eru 63 þingmenn eru 1.59% atkvæða á bak við hvern þeirra en samkvæmt kosningalögum (110. grein) sem sett voru í gildi af Alþingi árið 1999 þarf framboð að ná að lágmarki 5% fylgi á landsvísu til að koma til greina við úthlutun jöfnunarsæta.  Í SV-kjördæmi þarf 8.3% til að ná manni inn í kjördæmið (12 sæti) en 11.1% í NV-kjördæmi (9 sæti).  Þetta er harður raunveruleiki fyrir Íslandshreyfinguna en hér gildir að horfast í augu við staðreyndir og taka illskásta kostinn.   Ég hvet stuðningsmenn hennar að kasta ekki atkvæði sínu á glæ og kjósa ríkisstjórnina burt með þeim hætti sem nú er mögulegur.

Annars vil ég aftur vekja athygli á hjálpartæki kjósenda á http://xhvad.bifrost.is/

 

Fylgi Samfylkingar og Framsóknarflokks eykst

Hjálpartæki kjósandans

Ég mæli eindregið með því hjálpartæki sem nokkrir nemendur við Háskólann í Bifröst hafa sett saman til að hjálpa fólki að finna "sinn flokk".  Nemendurnir fóru grannt í stefnuskrár flokkanna og völdu svo ákveðnar spurningar til að fá fram aðgreiningu. 

Styrkleiki prófsins liggur reyndar í því hversu vel nemendurnir túlkuðu stefnuskrárnar og hversu vel stefnuskrárnar sjálfar endurspegla viðkomandi flokka.  Það er reyndar veikleiki hversu fáar spurningarnar eru og það vantar spurningar um "mannagæði" innan flokkanna.  Það gæti nefnilega komið upp sú staða að maður sé málefnalega sammála tveimur flokkum að sama marki og þá hlýtur m.a. mannavalið að ráða úrslitum.  Auðvitað er þetta hjálpartæki bara nálgun en gagnleg samt.  Skjalið sem fylgir til útskýringar og hægt er að hala niður af útskýringarsíðunni er mjög fróðlegt og vel unnið. 

Takk Bifröst!

Í anda Björns Inga

Nú er Framsóknarflokkurinn kominn á vonarvöl og mun reyna þessa fáu daga fram að kosningum allt sem leyfilegt er í "bókinni" til að tryggja sér nægileg þingsæti til meirihlutasamstarfs með xD. 

Þetta gerði Björn Ingi einnig fyrir borgarstjórnarkosningarnar í fyrra.  Það leit ekki vel út með framboð hans lengi vel en svo datt honum og Halldóri Ásgrímssyni í hug að hóta því óbeint að stjórnarsamstarfið á Alþingi væri í hættu ef Björn Ingi kæmist ekki að.  Hvort að þessi hótun virkaði til að ná atkvæðum veit ég ekki en hún virtist svínvirka til þess að Björn Ingi fengi samstarf við Vilhjálm í xD við stofnun nýs meirihluta sem hafði í raun ekki einu sinni meirihluta atkvæða á bak við sig í prósentum talið.  Frjálslyndi flokkurinn sem á vissan hátt var einn mesti sigurvegari kosninganna var "dissaður". 

Afleitt gengi xB í Norðausturkjördæmi, þar sem Valgerður Sverrisdóttir reynir nú að endurheimta fylgi flokksins, er eflaust orsök þessarar örvæntingar.  Nú á að þrýsta á stóra xD og fá hann einhvern veginn til hjálpar.  Ætli xD eigi ekki að lána þeim nokkur hundruð atkvæði?  Ætli "kraftaverk" muni gerast á kosningardag?  Ég býð spenntur eftir úrslitunum.

Valgerður: Framsóknarflokkur ekki í ríkisstjórn með svona lítið fylgi

Rökspjallið gegn guði

1. Guð er algóður, alvitur og alsjáandi.  -  Það er ljóst að þetta er ekki satt því allt í kringum okkur deyr fólk af tilefnislausu og fær að brjóta gegn boðorðunum óheft.  Guð drap (marga af hefndarlosta) áætlaðar um 2 milljónir manna samkvæmt frásögnum Biblíunnar, slatti af þeim börn og konur.  Algóður? Lokaðu á eftir þér vinur.
2. Guð skapaði heiminn (á 6 dögum).  -  Það er ljóst að engin vera getur verið svo flókin að hún skapi allan heiminn.  Hvað skapaði þá þessa flóknu veru?  Heimurinn, aldingarðurinn og Adam og Eva á 6 dögum  -  Kanntu annan?
3. “Þú skalt ekki aðra guði hafa”  - þarna er viðurkennt í Gamla Testamentinu að aðrir guðir gætu verið í myndinni.  Hvernig má það vera ef Guð átti að hafa skapað heiminn?  Kunni Guð ekki lögmál markaðarins?  Lítil fyrirhyggja í almáttugum guð að koma ekki á einokun strax.  Þá er ljóst að guð gyðinga, kristinna og múslima var ekki til fyrr en frekar seint í mannkynssögunni.  Áður voru þjóðir trúandi á fjölguðakerfi, t.d. forn-grikkir og víkingarnir.  Hugarfóstur manna, gæti það verið?
4. Guð á að tala til allra – hvers vegna þarf þá að kynna svo marga fyrir honum?  Hvers vegna voru ekki bara óþekktir þjóðflokkar með guðstrú á sama guð og hinn vestræni heimur þegar þeir voru “fundnir”.  Duh – er hinn vestræni hvíti kynstofn sem sagt hinn eini sanni mannstofn fyrst að þeir vissu um guð?  Oh, þess vegna var í lagi að halda öðrum þrælum eða hreinlega losa sig við þá.  Guð hefur talað.
5. Guð er faðirinn, sonurinn (Jesú) og heilagur andi en samt einn!   Hver er þessi heilagi andi?  Er það “mini-mí” guðs?  Pabbi, mini-mí og stráksi; kjút en frekar mikið hókus pókus að þeir komist upp með að vera allir en samt bara einn.  Skytturnar þrjár meika meira sens:  "einn fyrir alla og allir fyrir einn" - bravó!
6. Guð lagði fram boðorðin 10 þar sem segir “þú skalt ekki drýgja hór” en svo barnaði hann Maríu Mey kornunga eins og ekkert væri.  Búms! Jósef fékk engu breytt.  Eflaust getur Vísindakirkjan bent á að þarna hafi fyrsta stoðmóðir mannkyns komið til sögunar.  Sussumsvei - Guð að fikta með stofnfrumur!  Jesú átti að hafa verið hreinn sveinn og síðan þá hafa margar kynslóðir munka og kaþólskra presta reynt skírlífi með oft á tíðum skelfilegum afleiðingum.  Kynlíf – oj bjakk.  Af hverju gat Guð ekki losað okkur við það?  Þetta helvíti holdsins sem veitir okkur svona mikinn unað um leið og við búum til komandi kynslóðir.  Ó, ónáttúrulega himnaprik.
7. Guð og Biblían lofa eilífu lífi.  Auðvelt fyrir ósýnilegan að halda slíku fram í bók ritaðri af mönnum.  Komdu í minn flokk og þú færð kók og prins til eilífðar.   Sálin hefur aldrei fundist, ekki einu sinni af atómfræðingum.  Miðlar lofa og lofa en hafa aldrei fengið hina 1 milljón dollara sem James Randi lofar þeim sanni þeir mál sitt á vísindalegan máta. 

 

Æ, ég gæti haldið nær endalaust áfram.  Passlegt að enda í prímtölu. Upprisan yrði næst en hvers vegna að ráðast á svona góða frídaga?  Guð samkynhneigðra, er hann til?  Guð kvenpresta og blökkumanna, er hann svört kona?  Hún Gyða er sköpuð í mynd kvenmannsins. 

Náttúran sá okkur fyrir auðugu ímyndunarafli til þess að við gætum sett okkur í hin ýmsu spor og búið til verkfæri okkur til framfæris.  Trúartilhneigingin er mögulega erfðafræðileg hjánáttúra því við þurfum sem börn að trúa því sem fullorðnir segja okkur, ellegar brenna okkur, detta í brunninn eða enda undir alls kyns völturum.  Væntumþykjan er okkur náttúruleg og þjónar rökréttum tilgangi til bættrar afkomu.  Kettirnir hans Illuga Jökulssonar eru kjút (sjá maí blað Ísafoldar).

- Rökspjallamaðurinn Svanur

Hitnun jarðar - dæmin eru allt í kring

Ég horfði í kvöld á heimildarmyndina "an inconvenient truth" sem útleggst á íslensku "óþægilegur sannleikur".   Myndin er um hitnun jarðar og skilaboðin eru gefin af fyrverandi varaforseta Bandarríkjanna, Al Gore á mjög skýran, vísindalegan og sjónrænan máta.  Ég er mjög gagnrýninn á allt sem rétt er að mér þegar kemur að rannsóknum og vísindum, og oft finn ég galla á staðhæfingum manna, t.d. of mikið lagt upp úr vissum rannsóknum eða þær hreinlega ekki túlkaðar rétt.  Al Gore fer ekki nákvæmlega í aðferðafræði eða einstaka vísindavinnu en þau sönnunargögn sem hann kynnir eru úr svo mörgum áttum og frá svo mörgum aðferðum að þau eru mjög líkleg til að standast og þá meina ég MJÖG. 

Nýlega var frétt af dönskum vísindamanni sem hélt því fram að hitnun jarðar væri líklega af öðrum orsökum (breyting á sólinni) en aukinni losun koltvísýrlings.  Jafnvel þó að sá danski hefði rétt fyrir sér eða rétt að hluta, hefur mynd Al Gore sannfært mig um að við höfum hreinlega ekki tíma né efni á (þá á ekki bara við fjárhagslegt "efni á") því að bíða eftir því að sjá hvort hann hafi rétt fyrir sér.  Eftir 30-50 ár í viðbót af sömu lifnaðarháttum og orkustefnu heimsbyggðarinnar verða þegar orðnar verulega skaðlegar breytingar.

Verðum við ekki að skipta um orð, þ.e. velja eitthvað annað en "gróðurhúsaáhrif" yfir þessa skelfilegu þróun, t.d. "ofhitunaráhrif" eða "svækjuáhrif".  A.m.k. þarf orðið að vekja fólk til umhugsunar.  Í mínum huga eru gróðurhús þar sem ég fæ ljúfengar gúrkur og banana.

Ég hef ekki kynnt mér hitnun jarðar neitt að ráði en hef samt vitað af tilgátum þess eðlis frá því að ég var í menntaskóla (22 ár síðan).   Mér brá talsvert árið 2003 (minnir mig) þegar fréttir bárust þess efnis að skip (ísbrjótur) hafi í fyrsta sinn komist inn á miðjan Norðurpólinn.  Fréttir af hopandi jöklum á Íslandi og hvert hitametið af fætur öðru.  Svo bara fyrir 3 dögum sá ég að grasið var allt í einu orðið grænt!!  Ég er ekki náttúrufræðingur en þau 30 ár eða svo sem ég hef tekið eftir náttúrunni í kringum mig man ég ekki eftir grænum túnum í apríl á höfuðborgarsvæðinu.  Svo þetta í gær, óhugsandi 22,6 gráðu hiti á Norðurlandi (Ásbyrgi) og um 20° á Skagaströnd hjá tengdapabba (verðandi )  Það er hætt að snjóa af einhverju viti á veturna o.s.frv.  Frá 1970 hafa orðið meiriháttar breytingar á veðurfari.  Allt þetta staðfesti Al Gore í heimildarmynd sinni. 

Nú, ég hef nú ekki tekið þessa jarðarhitnun of alvarlega.  Hugsanir manns hafa verið dálítið í áttina til hmm... "það væri nú gott að fá heitari sumur á klakanum svo maður þurfi ekki að fara til sólarlanda alltaf hreint" eða "æ, ekki saknar maður þungra snjóvetra - maður fer bara á skíði í ölpunu... brekkurnar eru hvort eð er alltof litlar hérna".  Eitthvað í þessa veru.  Vissulega var maður farinn að hafa áhyggjur af hugsanlegri hækkun sjávar um 1 m eða svo, og svo aukinni tíðni hvirfilbylja í útlöndum, en Ísland er svo hátt yfir sjávarmáli og langt frá "hvirfilbyljalandi".   Eftir að hafa séð þau gögn sem Al Gore kynnti fyrir mér í kvöld, líður mér eins og fávísum hálfvita og með vissri réttu.  Hvers vegna hafði maður ekki kynnt sér þetta áður?  Hvers vegna hafði maður ekki skoðað betur mikilvægi Kyoto samningsins? 

Hætturnar sem steðja að hitnun jarðar eru mun meiri en ég hafði nokkru sinni gert mér í hugarlund og á mun fleiri sviðum en ég gat ímyndað mér.   Hér erum við að tala um 6 metra hækkun á yfirborði sjávar (bráðnun helmings Grænlandsjökuls og álíka svæðis úr Suðurskautsjöklinum) sem þýðir að heimili um 100 milljón manna færi á kaf og líklega yrði Vesturbær Reykjavíkur að eyju.  Það mætti því t.d. hætta að hugsa um framtíð Reykjavíkurflugvallar í Vatnsmýrinni því hún yrði "Sjómýrin".  Við fengjum Mosquito flugur til Íslands með tilheyrandi sjúkdómum.  Lúsin sem nú hefur skemmt mikið af grenitrjám borgarinnar færi hamförum (hún drepst í góðu frosti).   Meiri háttar breytingar yrði á lífríkinu og meiriháttar faraldrar nýrra sjúkdóma gætu breiðst út.   Við höfum nú þegar dæmi; SARS og West Nile Virus heilahimnubólgan en hún byrjaði í NY borg þegar ég var þar 1998 og hefur nú breiðst um öll Bandaríkin.  Þessi veirusýking berst með mosquitoflugunum og er banvæn í frekar háu hlutfalli þeirra sem veikjast.  Engin lækning er til.  Sem betur fer er þessi faraldur lítill enn sem komið er. 

Á Íslandi getum við gert margt til að minnka losun á koltvísýrlingi og við þurfum að taka verulega ábyrga afstöðu þó að við séum ekki meðal þeirra sem menga mest.  Bandaríkjamenn og Ástralir hafa ekki skrifað undir Kyoto samþykktina.  Við þurfum að þrýsta á þessar þjóðir því Bandaríkjamenn menga þjóða mest.  Ég skora á alla sem þetta lesa að fara út í næstu myndbandaleigu og horfa á mynd Al Gore, "óþægilegan sannleik" frá byrjun til enda.  Þetta er mynd sem varðar trúlega það sem mestu skiptir fyrir alla okkar framtíð og framtíð komandi kynslóða.  Mér er talsvert niðri fyrir.  Vanti okkur raunverulegt baráttumál, góðu bloggarar, þá er það hér á þessum vettvangi.  Hitnun jarðar verður að snúa við!

Upplýsingar um þessa mikilvægu heimildarmynd (sem fékk Óskarsverðlaunin í ár) og hætturnar af hitnun jarðar má finna hér

Hér að neðan er hlekkur að pdf skjali með upptalningu á 10 atriðum sem einstaklingar geta framkvæmt til að minnka losun "gróðurhúsalofttegunda" (sem mætti frekar kalla "ofhitunargös").  Sumt af þessum atriðum á frekar við um aðstæður í Bandaríkjunum en ábendingarnar eru góðar og gildar engu að síður.

Hitinn í 23°C í Ásbyrgi samkvæmt sjálfvirkum mæli

Skrár tengdar þessari bloggfærslu:

• 10 things

"Varnir Íslands" til sölu!

Ég vissi ekki betur en að háttvirtur utanríkisráðherra, frú Valgerður Sverrisdóttir væri í óformlegri ferð til viðræðna við Norsk stjórnvöld um hugsanlegt samstarf í varnarmálum.  Daginn eftir var svo tilkynnt að "óformlegur" samningur hefði verið undirritaður á milli þjóðanna og samkvæmt honum fengju Norðmenn (og Danir) aðstöðu með flugher sinn til æfinga í íslenskri fluglögsögu gegn einhverri þjónustu í björgunarmálum. 

Þetta kom verulega flatt upp á mig.  Vissulega hafði maður heyrt um að einhverjar þreifingar væru í gangi um samstarf þjóðanna en SAMNINGUR!? og það strax núna, 5 mínútum fyrir kosningar.   Ég hefði viljað sjá miklu meiri umræðu um þetta mál.  Varnar- og öryggismál þjóðarinnar eru ekkert grín og eiga skilið mikla umræðu.  Það eru friðartímar og það hastaði ekki að drífa í þessu.  Hver stjórnmálaflokkur hefði átt að fá að lýsa skoðun sinni í opinberri umræðu á RÚV / Stöð 2 og þetta mál hefði átt að fara fyrir þverpólitíska nefnd (utan varnamálanefndnar) sem hefði svo skilað áliti sem kynnt væri þjóðinni.  Í viðtali við fréttamann Mbl útilokar Geir Haarde ekki að einnig verði rætt við Þjóðverja.  Hvað er í gangi?  Er þetta gert í anda einkavæðingar?  Á ekki bara að gera samninga við óháð málaliðaherlið líka?

Þetta mál sýnir mér enn og aftur að það stórvantar í lýðræðislega hugsun í þessari ríkisstjórn.  Hún æðir áfram með stórar ákvarðanir í krafti valda sinna og vissu um áframhaldandi völd.  Ég bið þjóðina að velja þroskaðra fólk í ríkisstjórn.  Það skiptir verulegu máli að gefa stjórnarandstöðunni tækifæri þann 12. maí.

Forsætisráðherra segir varnir Íslands tryggðar

Úr limbó

Þetta er átakanlegt.  Vesalings kaþólsku prestarnir hafa legið yfir þessu "vandamáli" síðustu ár og hafa nú tekið út þessa bábilju.  Það er gott að það fækkar ruglinu hjá þeim en því miður eru önnur váleg tíðindi úr Vatikaninu.  Erkibiskup Austurríkis er mikill sköpunarsinni og vinnur í því að gera fólk afhuga þróunarkenningu Darwins.  Páfinn daðrar við þetta líka og setur sköpun Guðs einhvers staðar með þróunarkenningunni.  Þetta er í sókn hjá þeim því fylgjendum þeirra sem trúa bókstaflega á sköpunarsöguna fer fjölgandi en með nýjum umbúðum "vitsmunalegrar hönnunar (guðs)" halda þeir að hún sé fræðileg og á borð berandi sem sannleikur.  

Það er hreint hlægilegt en samt hrollvekjandi að lesa í þessari frétt að Vatikanið hafi "rannsakað" þetta í áratugi.  Þetta eru ekki neinar rannsóknir ekki frekar en karp presta á prestaþingi nýlega.   Þetta er gróf misnotkun á hugtakinu rannsókn.  Undanfarin ár hafa forsvarsmenn trúfélaga víða á Vesturlöndum (sérstaklega USA) misnotað vísindaleg hugtök í þeim tilgangi að slæva vitund fólks á því hvar mörk vísinda og hindurvitna / trúar liggja.  Þetta hefur tekist að nokkru leyti og það er kominn tími til að spyrna við fótum.

Óskírð börn ekki lengur í forgarði vítis