Sterkur listi - baráttan heldur áfram!

Úrslit prófkjörsins koma mér ekki sérlega á óvart því Árni Páll hefur verið mjög áberandi í fjölmiðlum undanfarna mánuði og komið fram af mikilli festu og öryggi.  Það stimplar sig í huga fólks og gefur tiltrú.  Hann er mikill talsmaður aðildar að ESB og hefur sérþekkingu á þeim málum, sem hann hefur látið óspart í ljósi t.d. á málefnafundum bæjarmálafélaganna í SV-kjördæmi.   Aðildarviðræður við ESB er í miklum brennidepli hjá virku fólki í flokknum og því er eðlilegt að það vilji styrk Árna Páls á því sviði í fremstu víglínu.  Ég sé hann fyrir mér sem utanríkisráðherra.  

Auk Árna Páls komu Þórunn Sveinbjarnardóttir og Lúðvík Geirsson sterkt til greina í forystusætið og var víst mjótt á mununum með að Lúðvík kæmist upp fyrir Árna Pál.  Bæði Lúðvík og Þórunn eru verulega frambærilegir stjórnmálamenn og hafa þekkingu og reynslu til að leiða lista.  Það hefur líklega háð Lúðvík eitthvað að hann hefur ekki verið áberandi í landsmálapólitíkinni og því á hann eftir að sanna sig á þeim vettvangi þrátt fyrir mikla reynslu og góða stöðu í sveitastjórnarmálum.  Þórunn kann að hafa liðið fyrir að hafa verið ráðherra í ríkisstjórn sem endaði með ósköpum en fjórða sætið er vel skipað með hana þar.  Katrín Júlíusdóttir spilaði mjög skynsamlega úr sínu og náði því í 2. sætið.  Hún nýtur þess að vera komin með tveggja ára reynslu á þingi og hafa ekki verið í eldlínu ásakana í efnahagshruninu.  Katrín er því eflaust enn í hugum fólks sem ferskur vindur endurnýjunar og glæsilegur fulltrúi kvenna á þingi. 

Magnús Orri Schram var sigurvegari nýliða í hópnum og náði 5. sætinu, sem verður jafnframt baráttusæti flokksins í alþingiskosningunum.  Ég hef trú á því að Magnús Orri eigi eftir að standa sig verulega vel í þeirri baráttu enda er hann mjög skipulagður og kemur máli sínu vel til skila.  Hann er búinn að starfa lengi með Samfylkingunni, m.a. sem kosningastjóri og því er hann vel að því kominn að fá þennan góða stuðning í sínu fyrsta prófkjöri.

Amal Tamimi mun fá 6. sætið því samkvæmt fléttureglunni þarf Magnús M. Norðdahl að færast niður.  Vinni listinn 5 þingsæti 25. apríl, verður Amal fyrsti varaþingmaður flokksins í kjördæminu og mun líklega fá að verma eitthvað bekki Alþingis, því ósjaldan þurfa þingmenn einhver leyfi frá störfum á fjögurra ára tímabili.  Þetta er sigur fyrir baráttu Amal fyrir jafnrétti og gegn mismunun að hvaða tagi sem er.  Hún talar máli aðflutts fólks og hefur kynnt sig m.a. á litháísku og ensku á vefsíðu sinni.

Magnús M. Norðdal er mikill talsmaður mannréttinda og jafnaðar  og á mikla reynslu að baki í stjórnmálastarfi.  Ég hefði viljað sjá hann ofar á lista en þegar einvalalið manna er til staðar geta ekki allir verið á toppnum í einu.   Hans tími kemur síðar enda er hann þrautseigur með eindæmum.

Sætin 8 til 15 voru ekki gefin upp opinberlega, en ég get sagt ykkur að ég fékk atkvæði frá 766 kjósendum og er ég mjög ánægður með það.  Ég tók þátt aðeins til reynslu, með skömmum fyrirvara og hafði ekki byggt upp nein tengslanet fyrir prófkjörið eins og tíðkast hjá reyndum stjórnmálamönnum.  Ég lít á þetta prófkjör einungis sem eitt skref af mörgum sem ég þarf að taka ásamt öðrum til að bæta mannréttindi og lýðræði á Íslandi.   Baráttan heldur áfram.

Þátttakan er búin að vera mjög lærdómsrík og hefur styrkt þá skoðun mína að frambjóðendur Samfylkingarinnar eigi skilið að fá góða kosningu 25. apríl nk. vegna góðra málefna og mannkosta. 

Ég var ánægður að heyra að umræðan um aflagningu kvótakerfisins er langt frá því að vera dauð innan flokksins og almennur áhugi á mannréttindum er mikill.  Margir tóku undir með mér um mikilvægi jafnrétti lífsskoðunarfélaga og kröfuna um eina hjónabandslöggjöf.

Með þennan mannauð ætti flokknum að vegna vel í SV-kjördæmi í komandi alþingiskosningunum.  Knörrinn er ferðbúinn og kominn með byr í seglin!

 

Árni Páll sigraði í Kraganum

Mannréttindi í öndvegi!

Enn á fjöldi skráðra kjósenda hjá Samfylkingunni í SV-kjördæmi eftir að skila inn sínu atkvæði í prófkjörið.  Í dag 14. mars er síðasti dagur kosningarinnar og fyrir þá sem eru að skoða fyrir hvað frambjóðendurnir standa þá vil ég kynna fyrir hvað ég stend.  Eftirfarandi eru mín áhersluatriði og eru manréttindi höfð í öndvegi.

Hið Nýja Ísland á að byggjast á endurreisn siðferðisins á öllum sviðum þjóðfélagsins og sérstök áhersla verði lögð á kennslu siðfræði og heimspeki í skólum landsins.   Þetta var megin niðurstaða opins vinnufundar á vegum Háskóla Íslands í febrúar þar sem saman voru komnir fulltrúar fjölmargra frjálsra félagasamtaka og fræðimenn úr háskólanum.  Ég vil að þetta verði að veruleika og legg að auki til að:    

Byrja á því að bæta siðferði í stjórnmálum og stjórnsýslu.  Þróa og koma í kring þroskaðra lýðræði.  Tryggja meiri valddreifingu.

• Minnka vald prófkjara.  Röð megi breyta í alþingiskosningum. 
• Stjórnlagaþing kjörið á 8 ára fresti til að endurskoða stjórnarskrána.  Þjóðaratkvæði. 
• Endurskoða ráðherravaldið og starfsreglur ríkisstjórnarinnar – leggja af „ráðstöfunarfé ráðherra“.  Takmarka meira ráðningavald ráðherra í dómstóla.
• Afnema 5% kjörþröskuld flokka.  Segjum nei við dauðum atkvæðum.

Mannréttindi snúast um að gefa öllum jöfn tækifæri og þegar misrétti er leiðrétt veldur það oft þeim sem nýtur forréttinda, óþægindum vegna minnkaðra fjárhagslegra gæða, áhrifa og valda.  Þetta fólk vill gjarnan ekki missa ofurlaunin sín eða skinhelgi sína og mun koma með óvægna gagnrýni á þá sem óska eftir jafnrétti.  Þetta þekki ég af eigin reynslu og er tilbúinn í baráttuna.Við höfum náð langt í land með sumt, en enn vantar að:

Útrýma launamisrétti og ráðningamisrétti kynjanna.

Sameina öll ástarsambönd í eina hjónabandslöggjöf.  

Í öðru höfum við vart byrjað að vinna í og löngu kominn tími til að sýna kjark með því að:

•  Afnema stöðu evangelísk-lútersku kristnu kirkjunnar sem þjóðkirkja.   Jafna stöðu lífsskoðunarfélaga gagnvart ríkinu.  
• Leggja af sérréttindi og fyrirgreiðslur þjóðkirkjunnar (jöfnunarsjóð og laun) ellegar veita öðrum félögum hið sama.  Afnema opinbera skráningu barna í trúfélög.  Spara má 2-3 milljarða með þessu sem nýta má til heilbrigðis- og menntamála. 
• Viðurkenna veraldleg lífsskoðunarfélög (Siðmennt) og gefa lagaréttindi til jafns við trúfélög.  Bæta hlutlausan húsakost til útfara í Fossvogskirkjugarði.  
• Afnema ýmis bönn í lögum tengd helgidögum þjóðkirkjunnar.  Afnema guðlastslög. 
• Afnema einkaaðgang þjóðkirkjunnar að leik- og grunnskólum.  Samkvæmt grunnskólalögum eru skólar ekki trúboðsstofnanir.  Banna dreifingu trúarrita í skólum.
• Afnema einkaaðgang þjóðkirkjunnar að alþingismönnum við setningu Alþingis og að þjóðinni með reglubundnum messum í ríkisútvarpi og sjónvarpinu á tyllidögum. 
• Færa aðalnámskrá í Kristinfræði, siðfræði og trúarbragðafræði í hlutlægt form þannig að í henni sé ekki þær stórkostlegu ýkjur fyrir mikilvægi kristninnar á kostnað annarra lífsskoðana eins og nú er þar ritað.

Eftirfarandi verður heldur ekki of oft kveðið:

• Færa auðlindir sjávarins aftur í fang þjóðarinnar.  Afnema kvótakerfið.       
• Samræma löggjöf gegn mismunun og auðvelda einstaklingum að sækja mál.     
• ESB aðildarviðræður – mannréttindalöggjöf ESB er til fyrirmyndar og langtum fremri okkar.
• Uppbygging fjölbreytts atvinnulífs án þess að skaða landið – ekki fleiri álver!

Ég vil vera kyndilberi ofangreindra mála á Alþingi til aukins jafnréttis á Íslandi.  Siðaðra og betur upplýst þjóðfélag í samfélagi vinaþjóða er ein farsælasta leiðin til meiri hamingju okkar allra.

Ég óska eftir stuðningi skráðra kjósenda í  3.-6. sæti á lista Samfylkingarinnar í SV-kjördæmi.   

---

PS:  Skráðir félagar í Samfylkinguna sem búa í SV-kjördæmi geta vitjað lykilorðs í heimabankanum sínum undir "Rafræn skjöl".  Sé ekki til staðar skjal með lykilorðinu þar má heimsækja síðunu www.vefprofkjor.is, velja kjördæmi og slá inn kennitöluna sína.  Þar er hægt að velja "endursenda lykilorð" og vitja þess á ný í heimabankanum.  Það ætti ekki að taka nema 2-3 mínútur.  Látum atkvæðin tala og veljum gott fólk til forystu.

Reynsla mín af kosningabaráttu í prófkjöri

Atkvæðin rúlla inn! 

Nú er liðinn einn sólarhringur frá því að kosning hófst í prófkjöri Samfylkingarinnar í SV-kjördæmi og hafa liðlega 300 manns hafa kosið skv. bráðabirgðatölum um þátttöku frá kjörstjórn.  Það telst góð byrjun og lofandi fyrir mikla þátttöku.

Ég er einn af 15 frambjóðendum og er þetta í fyrsta sinn sem ég tek þátt í prófkjöri.  Hópurinn er breiður og sterkur þannig að ég geri mér engar grillur um sæti framarlega þó auðvitað tæki ég slíku tækifæri fagnandi ef það gæfist.  Kosningabaráttan hefur farið einstaklega vel fram og frambjóðendur sýnt vináttu í garð hvors annars og verið í alla staði málefnalegir.  Skipulag kjörstjórnar hefði mátt vera aðeins betra, en hefur verið í öllum aðal atriðum mjög traust.  Það er mikilvægt að það má raða 6-8 frambjóðendum á kjörseðlinum því þá verður kosningin tölfræðilega marktækari fyrir 8 efstu sætin.  Samkvæmt reglunum eru 5 efstu sætin bundin, þ.e. kjörstjórn má ekki breyta röð þeirra nema til að uppfylla fléttulistaákvæðið.  

Það er sérlega jákvætt að fjöldi karla og kvenna í kjöri er jafn og gerðist það án þess að nokkrum þrýstingi væri beitt til að fá konur til framboðs.  Slíkt er merki þroskaðs flokks.  Fléttureglan gæti orðið einhverjum körlum til bjargar, en ekki konum.   Ég lít á það sem jákvætt "vandamál".

Það er búin að vera jákvæð og skemmtileg reynsla að funda með íbúum sveitarfélaganna í kjördæminu og hvernig sem fer í prófkjörinu þá tel ég að þau mál sem ég ber fyrir brjósti hafi nú heyrst víðar og vonandi vakið fleiri til umhugsunar.  Þau tvö mál sem ég var sá eini sem hélt á lofti í framboðsræðunum svo ég viti til voru:

1. Eina hjónabandslöggjöf fyrir alla.
2. Jafnrétti lífsskoðunarfélaga - aðskilnaður ríkis og einnar kirkju í stjórnarskrá og lögum.

Allir frambjóðendur höfðu sínar málefnaáherslur eða leiðir en gegnumsneitt var ánægjulegt að heyra að mikil samstaða var um að:

1. Lyfta þjóðinni úr öldudal græðgi og spilltra stórnmála.  Bæta lýðræðisskipan.
2. Að stjórnarsamstarf við xD sé óhugsandi og lýsa eigi yfir áhuga á samstarfi með Vg.
3. Að lágmarkskrafa og nauðsynlegt sé að fara í aðildarviðræður við ESB.
4. Stefna að fjölbreyttri atvinnuuppbyggingu og veðja ekki á fá stór egg.
5. Greiðsluaðlögun og stuðningur við fjölskyldurnar í landinu. 
6. Efla klassíska jafnaðarstefnu- skipta kökunni jafnt og búa öllum jöfn tækifæri.

Hægt er að kjósa fram til 16:00 á laugardaginn séu menn félagar í xS eða hafi skráð sig á stuðningsmannalista flokksins fyrir 10. mars sl. 

Ég ætla ekki að spá um úrslit, en hver sem þau verða mun Samfylkingin hafa á að skipa mjög traustu fólki - með hjartað á réttum stað - fyrir alþingiskosningarnar 25. apríl næstkomandi.  

Um stefnumál mín má lesa um í framboðsgreinum mínum merktum I-V hér neðar á blogginu. 

Ég hvet þá sem þetta lesa að taka þátt í skoðanakönnunum mínum hér í dálknum hægra megin. 

Ég þakka öllum meðframbjóðendum og þeim sem hafa veitt mér stuðning undanfarnar 2 vikur. 

 

Skref í rétta átt!

Það var ekki fyrr en árið 2006 að ég áttaði mig á því að sú hefð að skrá ómálga börn í trúfélög er fásinna og brot á rétti þeirra til að vera ekki stimpluð af skoðunum foreldra þeirra.  Engum dettur í hug að skrá börn í stjórnmálaflokka eða kalla þau eftir þeim, t.d. sjálfstæðisbarn eða samfylkingarbarn.  Ég hafði ekki hugsað út í þessa hluti og það var heimildamynd Richard Dawkins um trúarbrögð sem vakti athygli mína á þessari stimplun barna. 

Börn eiga að hafa frelsi til að móta sínar eigin skoðanir og þurfa ekki að mæta þrýstingi til að skrá sig í félög sem lúta að flóknum hugmyndakerfum eins og lífsskoðunarfélög (trúarleg eða veraldleg) eða stjórnmálafélög innihalda.  Hjá Siðmennt er ekki tekið við skráningum í félagið fyrr en við 16 ára aldur.  Ungmenni í borgaralegri fermingu þurfa því ekki að ganga í félagið og þurfa ekki að játa neina lífsskoðun umfram aðra.  Það er til mikils ætlast af 13-14 ára ungmenni að játast trúarleiðtoga en í kristinni fermingu er tekið af þeim heitið:  "Vilt þú leitast við að að gera Jésu Krist að leiðtoga lífs þíns?"  Þetta eru stór orð og óeðlileg að mínu mati.  Hvers vegna ætti nokkur manneskja að gera einhverja eina aðra manneskju að "leiðtoga lífs síns" og bugta sig fyrir fulltrúa hans?  Í kringum siðaskiptin um miðja 16. öld var til kristin deild manna sem lét ekki skírast fyrr en á fullorðinsaldri.  Þetta voru svokallaðir anababtistar.  Þetta hugnaðist ekki kaþólsku kirkjunni og var þessu fólki því útrýmt í Evrópu með fjöldamorðum.  Lúther skrifaði þeim til varnar í byrjun, en gerði ekkert meir. 

Ragna Árnadóttir dómsmálaráðherra ætlar að láta velferð barnsins ráða í þessu máli.  Ég vona að svo verði og að hún geri sér ljóst að ríkið á ekki að taka þátt í því að skrá börn í trúfélög og að sú sjálfkrafa skráning í trúfélag móður sem nú á sér einnig stað er einnig brot á rétti foreldrisins til að taka meðvitaða ákvörðun um það hvort að það vill skrá barnið eða ekki.

Endurskoða sjálfkrafa skráningu í trúfélög

Framboðsgreinar: hluti V - yfirlitsgrein áherslumála minna

Hér að neðan fer yfirlit þeirra mála sem ég stend fyrir í stjórnmálum og baráttu fyrir mannréttindum.   

Kæru kjósendur!

Ég heiti Svanur Sigurbjörnsson og er 44 ára læknir sem starfar á heilsugæslustöð Mosfellsbæjar og Slysa- og bráðamóttöku Lsh í Fossvogi.  Ég er giftur Soffíu Lárusdóttur, viðskiptafræðingi og á uppkomna dóttur í háskólanámi.  Ég hef starfað víða á landsbyggðinni og 7 ár erlendis.

Ég sækist eftir 3.-6. sæti á lista flokksins í SV-kjördæmi.   

Stefnumál mín eru flest í samræmi við stefnuskrá Samfylkingarinnar og helstu áhersluatriði mín eru:

·         Endurreisa efnahaginn með leikreglum sem gæta jafnvægis í bæði frelsi og taumhaldi, þannig að óvarleg áhættusækni verði ekki verðlaunuð, en frumkvæði fái að njóta sín.   

·         Nýta alla möguleika til greiðsluaðlögunar og sveigjanleika fyrir heimilin og fyrirtæki sem hafa ekki fyrirgert öllum möguleikum á því að rétta úr kútnum.  

·         Byggja upp atvinnuvegi sem skaða ekki „land eða lungu“.  Stóriðjustopp takk! 

·         Fara í aðildarviðræður við ESB.  Meta kosti og galla og ganga svo til þjóðaratkvæðagreiðslu.   

·         Bæta siðferði í stjórnmálum og stjórnsýslu.  Þróa og koma í kring þroskaðra lýðræði.

o   Minnka vald prófkjara.  Röð megi breyta í alþingiskosningum.

o   Stjórnlagaþing kjörið á 8 ára fresti til að endurskoða stjórnarskrána.  Þjóðaratkvæði.

o   Endurskoða ráðherravaldið og starfsreglur ríkisstjórnarinnar – leggja af „ráðstöfunarfé ráðherra“.  Takmarka meira ráðningavald ráðherra í dómstóla.

o   Afnema 5% kjörþröskuld flokka.  Segjum nei við dauðum atkvæðum. 

·         Mannréttindamál:

o   Útrýma launamisrétti og ráðningamisrétti kynjanna.

o   Eina hjónabandslöggjöf takk.  

o   Samræmda löggjöf gegn mismunun.  Gera fólki betur kleift að sækja mál. 

·         Afnám stöðu evangelísk-lútersku kristnu kirkjunnar sem þjóðkirkja.

o   Afnema ákvæði um þjóðkirkju í stjórnarskránni – þessu má breyta með lagabreytingu.  Forsetinn sé ekki verndari kirkju og Alþingi hefjist ekki í kirkju.  Árið er 2009 en ekki 1609!!

o   Jafna stöðu lífsskoðunarfélaga gagnvart ríkinu.   Leggja af sérréttindi og fyrirgreiðslur þjóðkirkjunnar (jöfnunarsjóð og laun) ellegar veita öðrum félögum hið sama.  Spara má 2-3 milljarða með þessu sem nýta má til heilbrigðis- og menntamála.

o   Afnema ýmis bönn í lögum tengd helgidögum þjóðkirkjunnar.  Afnema guðlastslög.  Afnema aðgang þjóðkirkjunnar að leik- og grunnskólum.

o   Viðurkenna veraldleg lífsskoðunarfélög (Siðmennt) og gefa lagaréttindi til jafns við trúfélög.  Bæta hlutlausan húsakost til útfara í Fossvogskirkjugarði.

o   Leggja af Guðfræðideild HÍ og stofna þess í stað fag í trúarbragðafræðum almennt.  Efla hlutlausa trúarbragðafræði og heimspeki í grunnskólum.  

·         Menntamál.  Auka veg kennara og efla kennslu í siðfræði, heimspeki, rökfræði, samskiptum, stjórnmálafræði og hugmyndasögu.  Auka úrræði gegn einelti og félagslegri einangrun. 

·         Heilbrigðismál

o   Reka metnaðarfullt heilbrigðiskerfi sem nýtur ákveðins forgangs í fjárlögum.

o   Spara með því að ríkið greiði niður valdar lyfjategundir.  Bæta fjármálastjórnun svo  heilbrigðisstofnanir borgi ekki milljónir í dráttarvexti vegna vanskila við byrgja.   

o   Stefna að sameiningu bráðamóttöku og bráðadeilda stóru spítalanna, en gera það með varanlegum hætti í nýjum spítala.  Milliplön kosta mikið. 

o   Bæta heimaþjónustu og byggja næg hjúkrunarrými fyrir aldraða.  Slíkt sparar mikið og greiðir fyrir þjónustu bráðasjúkrahúsanna.

o   Tvo forvarnardaga á ári í formi opinna laugardaga á heilsugæslustöðvum.  Byggja upp heilsteyptari áætlun forvarna, t.d. gagnvart ristilkrabba sem verði á leitarstöð, en annað í gegnum heilsugæsluna.  Vernda bólusetningakerfið frá áróðri gervivísinda.

o   Möguleika á 15 tímum á ári hjá sálfræðingi gegn tilvísun frá heilsugæslulækni.  Þetta gæti stuðlað að minni notkun geðlyfja og bættri geðheilsu.

o   Bæta tannvernd

·         Landbúnaður – Minnka miðstýringu.  Auka möguleika á milliliðalausri sölu afurða til fólks.

·         Sjávarútvegsmál – nú er lag til að leiðrétta það misrétti sem felst í kvótakerfinu.

·         Unga fólkið – Á krepputíma þarf styðja við fjölbreytta menntun, ekki síst verklega.  Innganga í ESB stuðlar að þeim stöðuleika sem þarf til að afnema verðtryggingu lána. 

Ég stend fyrir vönduðum málflutningi og vinnubrögðum innan flokks sem utan og hafna óhóflegri flokkspólitík því það er sama hvaðan gott kemur. 

Ég set málefnin ofar valdabrölti og eiginhagsmunapoti.  Ég vil stuðla að aukinni stjórnmálalegri þekkingu og bættri lýðræðisþróun.  

Stuðningur við framboð mitt gefur skilaboð um að ofangreind málefni eigi að njóta stuðnings og að mér sé treystandi til að framfylgja þeim á Alþingi.  Ég óska eftir því trausti frá þér og stuðningi til að hljóta 3.-6. sætið í prófkjöri SV-kjördæmis Samfylkingarinnar. 

Baráttukveðjur

Svanur Sigurbjörnsson 

- - - 

Prófkjörið er haldið 12.-14. mars með netkosningu eða með kosningu á kjörstöðum 14. mars í Hafnarfirði, Kópavogi eða Mosfellsbæ.   Það er opið félagsmönnum og skráðum stuðningsmönnum Samfylkingarinnar, sem þurfa ekki að ganga í flokkinn við það tækifæri.  Hægt er að skrá sig á www.samfylkingin.is á þar til gerðu formi í síðasta lagi 10. mars.  Skráðir félagar og stuðningsmenn fá úthlutað lykilorði í gegnum heimabanka.  Nánari leiðbeiningar eru á samfylkingin.is

Framboðsgreinar: hluti IV - Umhverfismál og atvinnustefna þeim tengd

Það er deginum ljósara að við þurfum raforku til að lýsa upp heimilin og elda matinn.  Við þurfum hana til að knýja ýmis raftæki, þ.á.m.t. tölvur og netþjóna.  Við ætlum ekki til baka 100 ár og afneita okkur þessum gæðum.  Við þurfum því virkjanir og einhverja viðbót við þær eftir því sem mannfjöldinn eykst. 

Virkjanir kosta okkur – ekki aðeins fjármuni, heldur einnig ásjónu landsins og valda breytingum á gróðri og dýralífi.  Fleiri vegir, fleiri rafmagnsstaurar, fleiri varasamar lagnir, fleiri skipulögð svæði í óspilltri náttúru. Við þurfum atvinnuvegi til að fæða og okkur og klæða, en hvar erum við stödd og hvaða valkosti höfum við til uppbyggingar á þeim?  Erum við svo illa stödd að stóriðja verður að vera í myndinni til að skapa lífsviðurværi handa hluta þjóðarinnar? Erum við svo aðþrengd með valkosti til uppbyggingar atvinnu að orkufrekur stóriðnaður og risavaxin netþjónasetur eru óumflýjanleg svo forða megi of miklu atvinnuleysi og langvarandi fjármálakreppu?

Dugir ekki lágorkuiðnaður, ferðaþjónusta, ræktun, búvöruframleiðsla, sjávarútvegur, hugbúnaðar- og tæknifyrirtæki, verslun, útflutningur fullunninnar vöru og annað margt smálegt í sniðum en stórt í heild?  Ég tel að þetta dugi. 

Eða er ástæðan fyrir brennisteinspúandi borholum, risastíflum, uppistöðulónum og álverum einfaldlega sú að erindrekar snjallra drengja  í forstjóraleik vilja nýta alla möguleika landsins til að snúa orkuframleiðslu í fjármuni?  Sjáið fyrir ykkur eftirfarandi með mér!

Maðurinn vill verða forstjóri og aðal hluthafi 500 megavatta virkjunar í einhvers konar „ríkis-einkaeign“,   Hann sér fyrir sér stálið og strókinn á himninum um leið og gormet elskandi megabeibið við hlið hans gefur frá sér sælubros yfir 800 fermetra sumarbústaðssetrinu sem er í byggingu.  Það stendur hátt uppi á fegurstu hæð náttúruperlu í innsveitum, sem gleymst hafði að friða.  Hann væri jafnframt virtur af hundruðum manna fyrir að skapa þeim atvinnu.  Þetta fólk teldi að án hans hefði það lifað í fátækt.   Millinafn hans væri „kaupmáttarauki“ og það myndi kosta hálfan milljarð að reka hann.  Fólki þætti það sanngjarnt vegna gríðarlegrar ábyrgðar sem felst í forstjórastarfinu. 

Höfum við ekki sagt nei við þessari sýn nú?  Bless 1997-2007!  Megi draugar græðgi þinnar koðna.

Við verðum alltaf að spyrja okkur; Erum við of gráðug og óþolinmóð eða erum við að gera það illskásta í stöðunni af brýnni nauðsyn?  Erum við að hugsa um að gera það nauðsynlegasta og valda sem minnstu náttúruraski eða viljum við framleiða orku og málm af því að það blasir við sem efnahagslegt páskaegg af stærð 8?  Við fullorðna fólkið eigum að vita að stærstu eggin eru ekki endilega þau hollustu fyrir okkur eða skila okkur mestri vellíðan á endanum.   Ég vil ekki fleiri virkjanir og stóriðjur, en renni upp sá dagur að hagfræðingar færi mér mjög góð og gild rök fyrir því að þjóðin þurfi nauðsynlega akkúrat slík úrræði til að forða sér frá fátækt og langvarandi atvinnuleysi, skal ég endurskoða afstöðu mína.   Líkt og þegar læknir hugar að meðferðarúrræðum fyrir skjólstæðing sinn, ætti fyrsta reglan í úrræðum til uppbyggingar atvinnu að vera; sköðum ekki!

Framboðsgreinar: hluti III - nánar um þrjá málaflokka

Málefni lífsskoðana, menntunar og heilbrigðiskerfis:

·         Aftenging ríkis og trúar, þ.e. aflögn þjóðkirkju.  Jafnræði lífsskoðunarfélaga

o   Leggja af þjóðkirkju og sérstaka verndun hennar skv. stjórnarskrá.   Hún verði að taka upp annað heiti og biskup hennar verði ekki „biskup Íslands“.  Forsetinn á að vera verndari allra þegna landsins, ekki einungis eða sérstaklega evangelísk-lúterskra kristinna manna.  Alþingi komi saman í Háskóla Íslands og hlusti á stutta ræðu rektors í stað þess að fara í dómkirkju kristinna.  Einnig má sleppa alfarið slíku fyrir setningu Alþingis. 

o   Halda sóknargjaldakerfinu til handa trúarlegum og veraldlegum lífsskoðunarfélögum, en önnur fjárhaldsleg tenging ríkisins við félögin verði ekki.

o   Greiða öðrum en þjóðkirkjunni jöfnunarsjóðsgjöld í 3 ár og leggja svo sjóðinn niður.  Jöfnunarsjóður byggir á 18% upphæð af sóknargjöldum.  Jafna þarf aðeins það mikla misrétti að einungis þjóðkirkjan hefur notið þessa sjóðs síðustu öld.

o   Lækka laun presta þjóðkirkjunnar um 25% á ári í 2 ár og hætta svo launagreiðslum eftir 3 ár.  Með þessu næst mikill sparnaður fyrir ríkið en vilji þjóðin ekki spara á þennan hátt verður að greiða samsvarandi launakostnað til annarra lífsskoðunarfélaga einnig.  Slíkt yrði aukning um 15% í launakostnaði í stað sparnaðar.

o   Hætta skráningu barna undir 16 ára aldri í trúfélög, þ.m.t. sjálfkrafa skráningu þeirra í trúfélag móður.  (Sóknargjöld miðast við skráða einstaklinga 16 ára eða eldri).

o   Viðurkenna veraldleg lífsskoðunarfélög  - þau fái sóknargjöld og lagastöðu til að gifta.  Nefna í lögum um útfarir athafnarstjóra sem faglærða aðila sem stýra útförum og tryggja að óvígðir grafreitir séu í kirkjugörðum.  Rýmka lög um ráðstöfun ösku látinna. 

·         Efling menntunar.  Rökfræði, siðfræði og aðferðafræði vísinda gerð mun betur skil.

o   Bæta kjör kennara og lengja aðeins skólaárið.  Efla raunvísindi.  Áfram frían háskóla.

o   Kenna hugmyndasögu og heimspeki til jafns við aðra sögu. 

o   Efla aga og taka á gerendum eineltis í skólakerfinu.  Færa þarf úrræði í hendur kennara og skólastjórnenda svo foreldrar þurfi að gera eitthvað í málunum einnig.

·         Heilbrigðiskerfið: 

o   2 forvarnardaga á ári í formi opinna laugardaga á heilsugæslustöðvum.  Byggja upp heilsteyptari áætlun forvarna, t.d. gagnvart ristilkrabba sem verði á leitarstöð, en annað í gegnum heilsugæsluna.

o   Fimmtán tíma á ári hjá sálfræðingi gegn tilvísun frá heilsugæslulækni

o   Taka meira þátt í tannvernd.

o   Sameina spítala höfuðborgarsvæðisins undir eitt þak hið fyrsta.  Þetta á sérstaklega við um bráðamóttöku og legudeildir bráðveikra ásamt öllum skurðdeildum sem sinna bráðatilvikum.  Til að gera þetta á öruggan máta þarf nýtt hús.  Það þarf ekki að vera eins gríðarlega stórt og upphaflega var áætlað.   Slík framkvæmt gæti reynst góð innspýting í atvinnulífið.

o   Banna með reglugerð eða lögum innlagnir á ganga spítaladeilda.

 

Fleira má tína til en ég vil nefna það að í niðurstaða vinnuhópa á nýlegum fjöldafundi sem haldinn var á vegum HÍ, þar sem fólki úr ýmsum frjálsum samtökum og félögum var boðið, var sú að mikilvægast til að byggja upp "nýtt Ísland" var að efla siðfræði og siðferði í landinu, m.a. með eflingu menntunar um slíkt á öllum stigum grunnskóla.  Ég var mjög ánægður að sjá þá niðurstöðu og gefur mér von um að við getum gert breytingar á þjóðfélaginu til aukinnar farsældar (en ekki einungis hagsældar) og hamingju.

Í dag hefst skráning stuðningsmanna Samfylkingarinnar (þ.e. fólks sem vill taka þátt í prófkjörinu þó að það sé ekki skráðir félagar í xS) á www.samfylkingin.is og lýkur henni 10. mars.  Viljir þú lesandi góður styðja mig í að koma ofangreindum málum á framfæri og í lög okkar landsmanna getur þú skráð þig og greitt mér atkvæði í netkosningu (eða farið á kjörstað) dagana 12-14. mars í 3-6 sæti, því ofar, því betra auðvitað ;-) .  Nánari upplýsingar liggja einnig fyrir í bæklingi sem dreift er í dag til allra íbúa í SV-kjördæmi.  Skrifa má mér á netfangið svanurmd hjá gmail.com fyrir nánari upplýsingar. 

Framsókn í hnoði

Í stað þess að vera flokkur sem styður stjórnina falli í þessa fáu daga sem hún starfar, þarf Framsóknarflokkurinn að vera í hnoði til þess að slá sig til riddara og reyna að láta líta út eins og þeir séu framhjólið á þríhjólinu.  Formaður þeirra segir að með tillögum sínum hafi þeir viljað hjálpa til og flýta fyrir, en með því að koma með þar innan um draumórakennda tillögu um 20% niðurfellingu skulda, tókst þeim akkúrat hið gagnstæða.  Það er ekki hægt annað en að svara slíkri tillögu og slíkt tefur og tekur orku frá þeim mönnum sem eiga að einbeita sér að samningu aðgerða.  Getur Framsókn ómögulega setið á strák sínum (eða hverju sem þeir sitja á venjulega) og gefið þeim flokkum sem tóku ábyrgð á ríkisstjórn landsins frið til að vinna?  Auðvitað eru þeir æstir í að sýna sig og sanna með nýtt fólk við stjórnvölin, en of mikið pot getur hreinlega virkað öfugt, enda sýnir sig að uppsveifla þeirra hefur hjaðnað talsvert í síðustu skoðanakönnunum.  Hott hott Framsóknarfákur!

Fundað um stjórnarsamstarfið

Framboðsgreinar - hluti II: Lýðræði og kosningar

Eins og í sagði í síðasta bloggi mínu, þá býð ég mig fram í 3-6. sæti í prófkjöri Samfylkingarinnar í SV-kjördæmi 12-14. mars.  Rétt til að kjósa í prófkjörinu hafa skráðir félagsmenn xS í kjördæminu og svo fólk sem skráir sig á lista stuðningsmanna Samfylkingarinnar á www.samfylkingin.is frá og með 4. mars.

Lýðræði og kosningar

Við búum við fulltrúalýðræði á Íslandi.  Nánast engar þjóðaratkvæðagreiðslur um málefni fara fram þannig að kjörnir þingmenn ráða málum eftir að þeir hafa náð kjöri.  Í stóru flokkunum er ákveðið í tiltölulega smáum prófkjörum hverjir fá að fara á þing og þingkosningarnar sjálfar hafa nær ekkert um það síðan að segja, hvernig röð manna er.  Útstrikanir á nafni Björns Bjarnasonar í síðustu kosningum höfðu t.d. ekkert að segja og maðurinn var meira að segja gerður að ráðherra eftir þá útreið sem hann fékk í kosningunum.  Flokksforystan gaf kjósandanum fingurinn.

Prófkjör geta farið sæmilega fram, en oftar en ekki fara þau herfilega fram.  Þeir ríkustu og frekustu smala saman fólki sem þekkir frambjóðandann aðeins af afspurn eða á sameiginlegt póstnúmer með viðkomandi, og massa inn atkvæðum frá fólki sem nýgengið er í flokkinn.  Þetta eru ekki upplýstar ákvarðanir sem þarna eru teknar, heldur breytast stjórnmálin þarna í eins konar íþrótt og smölunarlist.  Í ljósi þess hversu mikilvægar ákvarðanir eru teknar í prófkjörum og með hliðsjón af þessum alvarlegu vanköntum þeirra er vald þeirra of mikið.  Ég er því hlyntur því að ekki séu birtir listar með númerum (þó raðað sé skv. prófkjöri) á kosningaseðlunum, heldur geti kjósandi viðkomandi flokks breytt röðun kjörmanna í kosningunum sjálfum.  Einfaldar meirihlutareglur gildi þar, þ.e. ef meira en 50% kjósenda vill einhvern mann niður um sæti (eða upp), gildi það, en ekki útkoma prófkjörs.  Í þingkosningum er ekki hægt að smala á sama máta og við prófkjör og því er þetta mun lýðræðislegri máti.  Einnig eru frambjóðendur búnir að fá lengri tíma til að kynna sig.

Annað sem ég vil breyta varðandi kosningar er sá þröskuldur framboða sem þarf til að ná manni á þing.  Í dag þarf 5% fylgi sem þýðir að ná þarf a.m.k. þremur mönnum inn til að ná einhverjum á þing.  Nóg ætti að vera að geta náð einum manni inn því þannig er í raun verið að leyfa visst form af einstaklingsframboði sem svo margir hafa óskað eftir.  Vissulega geta stakir þingmenn skapað ákveðin vandamál í myndun ríkisstjórna, en ég tel að það vandamál skipti minna máli en réttur manna til að njóta sannmælis af fylgi sínu.

Þjóðaratkvæði - þau á að gera mögulegri.

Stjórnarkreppa eða umboðskrísa.  Til þurfa að vera viðmiðunarreglur um það hvenær ríkisstjórn hafi misst traust og eigi að boða til nýrra kosninga.  Það má ekki gerast að stjórnir þaulsitji eins og steinrunnir þursar þegar mikilvægar forsendur kosningar þeirra á alþingi eru brostnar.

Flokkaskipti þingmanna.  Skoða þarf af alvöru slík mál.  Það er mótsögn í því að þingmaður fari með fylgi sitt í allt annan flokk en kaus hann.  Þarna þarf nýjar viðmiðunarreglur og þætti mér ekki óeðlilegt að slíkt sé leyfilegt 4-6 mánuðum fyrir lok kjörtímabils, en ekki fyrr. 

Meira síðar.  Hvað finnst þér?

Býð mig fram í 3-6. sæti í prófkjöri Samfylkingarinnar í SV-kjördæmi!

Kæru lesendur moggabloggs

Ég hef skráð mig í prófkjör Samfylkingarinnar á Kraganum sem mun fara fram með netkosningu félaga og skráðra stuðningsmanna Samfylkingarinnar dagana 12.-14. mars (fim-lau) nk.

Þetta er í fyrsta sinn sem ég býð mig fram á lista til alþingiskosninga, en áður kom ég að stjórnmálastarfi í Frjálslynda flokknum og Íslandshreyfingunni.  Það kom aldrei til þess að ég byði mig fram með þessum flokkum því mér leist ekki nógu vel á gang mála hjá þeim þegar dró nær kosningum.  Valdabarátta og ósætti gekk að þeim fyrrnefnda nær dauðum og hinn þjáðist af óskipulagi og ólýðræðislegum vinnubrögðum.  Ég gekk því í Samfylkinguna 1 mánuði fyrir kosningarnar fyrir 2 árum.   Samfylkingin hefur höfðað til mín frá því að hún var stofnuð, en ég var ekki nógu sáttur við að mér fannst skorta á baráttu gegn kvótakerfinu og jafnræði lífsskoðunarfélaga (t.d. afnám ríkistrúar).  Þó að enn skorti þar á, hefur flokkurinn alla möguleika á því að bæta þar um og sá mannauður sem þar er, er grundvallarforsenda þess að hægt sé að koma góðum málum gegnum Alþingi.  Þau tæpu 2 ár nú sem ég hef verið í Samfylkingunni hafa sannfært mig um að hér sé flokkur sem hafi mestu möguleikana á því að gera þjóðinni hve mest gagn næstu árin.  Í framboði nú í prófkjörinu í SV-kjördæmi er jafnt hlutfall kvenna og karla, en það ber því vitni að flokkurinn hefur náð þeim þroska að hann höfðar jafnt til beggja kynja.  Þetta er einn sá besti gæðastimpill sem flokkur eða félag getur fengið. 

Í mínum huga eru það tvenns konar málefni sem skipta okkur mannfólkið mestu.   Það eru annars vegar lífsskoðunarmál og hins vegar stjórnmál.  Þessi mál skarast oft og eru hver öðru háð.

Lífsskoðunarmálin varða siðferði okkar, tengsl, fjölskyldulíf og hverju við trúum að sé gild þekking.  Þau snúast einnig um félög og leiðtoga tengdu þessu.  Trúarleg lífsskoðunarfélög eru fjölmennust og trú á guð eða guði hefur ráðið hugum margs fólks með góðu eða illu um þúsundir ára.  Veraldleg lífsskoðunarfélög (húmanistar, efahyggjufólk, skynsemishyggjufólk o.fl.) hafa fengið að anda frjálst í aðeins nokkra áratugi þó hugmyndafræði þeirra sé miklu eldri og má t.d. rekja til ýmissa hugsuða Forn-Grikkja.  Lífsskoðunarmálin eru f.o.f. mikilvæg því þau taka afstöðu til þess hvernig við breytum siðferðilega og innifala spurningar og svör um það hvaðan siðferði okkar kemur.  Lög og mannréttindi byggja algerlega á siðferðinu og því hafa lífsskoðanir veruleg áhrif á þjóðfélagsgerðina og réttarfarið.  Þær eru því valdamiklar og afdrifaríkar, rétt eins og stjórnmálaskoðanir.  Það vald sem þær fela í sér er best aðskilið frá öðrum valda- og menntastofnunum ríkisins, því út á það gengur trygging lýðræðisins.  Valddreifingin er líflína siðaðs þjóðfélags og forsenda þess að ekki skapist spilling.  Við Íslendingar stöndum okkur ekki nógu vel í þessu tilliti.

Stjórnmálin ganga út á það hvernig við getum lifað farsællega saman í landfræðilega afmörkuðum hrærigraut og í sátt við aðra grauta heimsins.  Í gegnum mannkynssöguna er afrekalisti okkar mannanna hreint hörmulegur.  Það er mesta furða að við höfum ekki endanlega tortímt hvort öðru og miklu af öðru lífi jarðarinnar með.  Þrátt fyrir djúpa efnahagskreppu nú hafa síðastliðin 64 ár friðar á milli stórvelda gefið tilefni til bjartsýni og ástæðu til að brosa (sjá mynd af mér ;-)  Hugmyndum okkar um mannréttindi og framkvæmd þeirra hefur fleygt fram, en því miður hefur mikill fjölda þjóða utan hins vestræna heims ekki notið ávaxtanna af þessu.  Við skynjum æ meir að mannkynið er ein heild og afdrif fátækra í Afríku eða Indlandi varða okkur öll.  Við viljum geta skoðað alla náttúru heimsins og ferðast án þess að óttast um öryggi okkar.  Siðferðisvitund okkar krefst þess nú að við kaupum ekki bara kaffi á hræódýru verði því kaffibóndinn í Guatemala á ekki að vera þræll, heldur njóta sanngirni og virðingar eins og við teljum sjálfsagt hér heima.  Slíkt minnkar einnig áhuga þeirra á því að rækta plöntur fyrir eiturlyf og það minnkar líkur á notkun eiturlyfja hér heima. 

Stjórnmálin ganga út á að:

• Halda vörð um dýrmæt siðferðisgildi, t.d. verndun lífs, frelsis og eigna fólks með lögum og réttarkerfi.  Gæta mannréttinda.
• Búa til samtryggingu
  • Fjárhagsleg - varasjóðir, félagsaðstoð, húsnæðiskerfi
  • Heilsufarsleg - heilbrigðiskerfi, hreinlæti o.s.frv.
  • Menntunarleg - fólk geti menntað sig óháð efnahag.
  • Menningarleg - verndun og vöxtur menningu.  Söguritun og fornleifar.
• Byggja upp sameiginlega aðstöðu til að ferðast og koma saman.  Samgöngukerfi.
• Reka eða styðja við ákveðna atvinnuvegi - stundum bara til að koma á legg, stundum alla tíð.
• Tryggja samráðsvettvang og fjölmiðlun - flæði upplýsinga til allra
• Hafa samskipti og samvinnu (og viðskipti) við aðrar þjóðir og bandalög þjóða.
• Vernda umhverfið og hindra spillingu landsins.   Gæta að öðru dýralífi. ;-)
• Tryggja dreifingu valds og stefna að sem mestri hamingju fyrir sem flesta. 

Síðast en ekki síst er það stjórnmálanna að greina á milli þess sem ríkið á að skipta sér af eða tengjast og þess sem það á að láta vera utan sinna anga.  Þetta er mikilvægt bæði vegna þess að ríkið á ekki að láta fé í starfsemi sem á að vera rekin af óháðum aðilum og vegna þess að ríkið þarf að halda jafnræði og hlutleysi gagnvart ólíkum þegnum sínum. 

Ríkið á fyrst og fremst að tryggja farvegi og aðstöðu, en ekki vera handbendi eða sjóður fyrir forréttindahópa.  Það virðist sem að þetta ættu allir að skilja, en raunveruleikinn er annar í íslensku þjóðfélagi.  Hér ríkir mismunun á ýmsum sviðum:

• Launamisrétti kvenna og karla - enn eigum við nokkuð í land, heil 15% eða svo.
• Atvinnuréttindi í sjávarútvegi - kvótakerfi í bága við mannréttindi (skv. MRNSÞ)
• Hagkerfi sem þjónar vel fyrirtækjum en illa einstaklingum.  Fólkið situr í súpunni og þarf að greiða alls kyns gjöld tengd lánum og húsnæðiskaupum.  Launafólkið ber skattbyrðarnar.
• Undanfarin 17 ár hafa stöðuveitingar verið veittar flokksgæðingum xD og xB.  Gengið fram hjá hæfu fólki sem stöðuveitinganefndir hafa mælt með. 
• Lífsskoðunarfélögum mismunað og haldið uppi ríkistrú.  Ímyndið ykkur að einn stjórnmálaflokkur yrði sérstaklega verndaður með stjórnarskrárákvæði, sem "þjóðflokkurinn" og um hann mætti aldrei kjósa því hann hefði flesta skráða félaga frá fæðingu.  Það er ekki siðaðri þjóð sæmandi að hafa ríkistrú í formi þjóðkirkju, sem auk milljarða króna í fyrirgreiðslum og launum, fær sérstakan aðgang að hugum þingmanna fyrir hverja þingsetningu.  Trúarleg lífsskoðunarfélög utan þjóðkirkjunnar fá smá kökubotn (sóknargjöld) en veraldleg lífsskoðunarfélög (aðeins Siðmennt nú) fá ekki einu sinni mylsnu.  Ljótt mál!
• Jafnréttislöggjöf á Íslandi er um 15 árum á eftir ESB og það vantar skilvirkt eftirlitskerfi t.d. stjórnsýslustofnun sambærileg við Jafnréttisstofu.  Tryggja þarf betri og auðveldari aðgang að dómskerfinu.  Lög þurfa að ná til fjölþættrar mismununar og fleiri jaðarhópa.
• Innleiða þarf alla ESB löggjöfina um bann við mismunun en ríkisstjórnir xD hafa talið það óþarfa í sinni valdatíð.

Úr þessum málum og fleirum vil ég að bætt verði úr.  Ég mun útlista það frekar í blogggreinum og víðar á næstu 2 vikum.   Af mörgu er að taka og siðferði stjórnmálanna sjálfra er eitt af þeim mikilvægustu málum sem taka þarf til hendinni í.  Vinnubrögð ríkisstjórna, ráðherraveldið og fleira þarf gagngera endurskoðun. 

Ég leita eftir stuðningi félaga í Samfylkingunni (eða skráðra stuðningsmanna) í SV-kjördæmi til að berjast fyrir þessum málum á Alþingi og til þess þarf að kjósa mig í 3-6. sæti í prófkjörinu, helst 4. eða 5. sæti. 

Hér má sjá nánar um reglur og fyrirkomulag prófkjörsins ásamt lista yfir alla frambjóðendur.

Svanur Sigurbjörnsson